Tíðindi

Gjáar kirkja 90 ár

19.06.2019

Hátíðargudstænasta varð í Gjáar kirkju í vikuskiftinum tí tað í mai mánað vóru 90 ár síðani kirkjan varð vígd.

Mánadagin varð Heðin Zachariasen, borgarstjóri, við Gjógv og handaði kirkjuráðsformanninum eina peningagávu frá kommununi.

Um Gjáar kirkju

Tað var tríeindarsunnudag 26. mai í 1929, at Gjáar kirkja varð vígd. Dagurin var søguligur á meira enn ein hátt. Ikki bert fingu gjáarfólk sína egnu kirkju; hetta var eisini fyrstu ferð, at ein kirkja varð vígd við føroyskum rituali, hóast føroyskt ikki gjørdist kirkjumál fyrrenn tíggju ár seinni.

Serligt við Gjáar kirkju er eisini, at hon ikki vendur eystur og vestur sum aðrar kirkjur, men suður og norður, tí soleiðis hildu teir gomlu, at hon fór at síggjast best frá sjónum.

Av skjølum sæst, at longu í 1905 høvdu gjáarmenn ein umsókn um stuðul til kirkjubygging til viðgerðar í Funnings sókn.

Men tað skuldi vísa seg at verða drúgt at koma á mál - ferð aftaná ferð fingu teir noktandi svar frá myndugleikunum.

Um heystið 1925 var so ein 7-manna nevnd sett við tí endamáli at fáa kirkjuna bygda. Nevndarformaður var Vilhelm Nielsen, sóknarprestur á Nesi, og Jóhan Kallsoy, lærari, var næstformaður og kassameistari.

Um sama mundið varð so eisini sett ein bygginevnd. Formaður var somuleiðis Vilhelm Nielsen, sóknarprestur á Nesi, ið var undangongumaður at fáa kirkjuna bygda.

Farið varð nú av álvara undir at fáa pening, og m.a. var í februar 1926 ein stór lýsing í bløðunum um kirkjubasar, sum ætlanin var at hava í bygdini.

Við hesum tiltøkum varð savnað so mikið væl av peningi, at menn hildu tað verða ráðiligt at fara til verka. Tað var Kristian Vilhelm Nielsen, sóknarprestur, ið teknaði kirkjuna. Heitt var á Joen David Jacobsen úr Søldarfirði, ið játtaði at verða formaður fyri byggingini.

Í eini Synsforretning, ið er send til Færø Provsti 26. mai 1929, siga teir báðir, Tømrermester Zacharias Jacobsen og Stenhugger Elieser Hansen, begge af Thorshavn, at teir nú hava skoðað tað nýggju kirkjuna við Gjógv, og er niðurstøða teirra m.a. henda: Kirkebygningen, som blev nøje efterset, befandtes at være godt og solidt opført, baade ind- og udvendig.

Tveir mánaðir, áður enn kirkjan skuldi verða vígd, sendi bygginevndin Jákupi Dahl, prósti, eitt skriv við teirri umbøn, at øll vígslugudstænastan skuldi verða á føroyskum, tí at tað var vanligt fólkaynski í bygdini. Og so varð.

Trinitatis sunnudag 26. mai 1929 var so henda søguliga kirkjuvígsla framd í verki.

Upprunaliga var ætlanin, at kirkjan skuldi verða 30x15 alin uttan; men helst av vantandi fíggjarligum stuðuli varð hon munandi minkað, so hon ístaðin er 24x12 alin. Hæddin millum sylla er 3,86m.

[KELDA: J. P. Gregoriussen, Nýggjaru Kirkjurnar]

Kirkjuráðið

Seinastu tíðindi

18
mar
Ongin gjøgnumkoyring
18
mar
Fráboðan um fund í Náttúrufrið­ingar­nevndini
27
feb
Kunngerð um broyting av byggisamtykt fyri Sunda kommunu
14
mar
IRF ber nýggjar posar út í viku 11 og 12
08
mar
1000 SÍÐUR !
07
mar
Borgarafundur í Tjørnuvík
05
mar
Arbeitt verður uppá lyktapelar­nar í Streymnesi
04
mar
Menningarskeið í palliatión