Tíðindi
Sunda kommuna á jobmatch
Í Sunda kommunu eru vit altíð opin fyri góða hugskotinum og íkastinum, ið kann skapa menning, vøkstur og trivna í økinum. Sunda kommuna er í støðugari menning og nýggjar uppgávur stinga seg javnan upp. Sunda kommuna hevði tí avgjørt at verða við á árligu starvstevnuni Jobmatch, sum skuldi verða í Norðurlandahúsinum 29. desember.
Sum so mangt annað í hesum døgum, so hava fyrireikarnir tó valt at avlýsa tað fysiska Jobmatch tiltakið, og flyta stevnuna yvir á talgildu miðlanar. Hóast korona spennir bein fyri at vit hittast andlits til andlits, so eru vit áhugaði í at hittast talgilt.
Landafrøðiliga er Sunda kommuna partur av miðøkinum og ein av størstu kommununum í landinum. Hetta skapar møguleikar og setur eisini krøv til at skipa vinnununa, so væl sum til ber. Kommunan hevur millum annað sett sær fyri at skipa ferðavinnuna betur. Ferðavinnupolitikkurin skal dagførast, og ein virkislagað ætlan skal gerast fyri, hvussu vit tryggja at hendan vinnan mennist til gagns fyri bæði borgarar, vinnurekandi og vitjandi í økinum.
Á tekniska økinum eru eisini nógvar ætlanir í umbúnaði, millum annað innan býarplanlegging, útstykkingar, spillvatnsskipanir, vetrarfriðing v.m.. Sunda kommuna ynskir samstundis, at ganga undan á grønu leiðini og hevur eisini í hyggju at orða ein umhvørvis og orkupolitik.
Sunda kommuna hevur sostatt nógvar ætlanir og uppgávur fyri framman, so er tú lesandi og leitar eftir tilfari og evnum til uppgávuskriving, ella leitar tú eftir starvi og hevur servitan innan okkurt av nevndu økjum, so er Sunda kommuna áhugað í at fáa eitt prát við teg um møguligt samstarv.
Bílegg eitt jobprát her…