Tíðindi

Til stórsligið og væl fyriskipað tiltak í Varpinum í Klaksvík farna leygardag fekk Hósvíkar Róðrarfelag heiðurin sum ársins ítróttafelagsskapur 2025.

Í Sunda kommunu hevur ongantíð nakar ivi verið um tað stóra arbeiðið, ið sjálvbodnu fólkini handan Hósvíkar Róðrarfelag hvønn dag gera. Hósvíkar Róðrarfelag er av álvara ein savningarmegi í nærumhvørvinum. Út yvir at skapa eitt gott róðrartilboð til øll, ið ynskja at rógva, so skipar Hósvíkar Róðrarfelag fyri eini røð av trivnaðarfremjandi tiltøkum í bygdini. Millum annað skipar Hósvíkar Róðrarfelag fyri væl kendu Regatta siglingini, ið savnar fólk úr øllum Føroyum. 

Til hugnaliga samkomu farna sunnudag bar borgarstjórin felagnum eina heilsan vegna kommununa, umframt eina gávuupphædd áljóðandi 5.000kr. fyri heiðurin sum Ársins ítróttafelagsskapur 2025. 

Sunda kommuna ynskir Hósvíkar Róðrarfelag hjartaliga tillukku við heiðurinum sum ársins ítróttafelagsskapur 2025!