Tíðindi

Sum flestum kunnugt, hevur Eiðis Ljómfelag verið í stórari menning seinastu árini, og hettar gav sanniliga útslit, tá ið ein bólkur av blásarum varð boðin til Suðuroyar, at venja saman við sangkórinum Ljómi i Vági.
Sunnudagin var stórfingin konsert í Vágs kirkju, har blásarar og sangarar heiðraðu tónaskaldinum Knút Olsen.
Til høvið hevði Atli K. Petersen lagt 8 løg hjá Knút Olsen til rættis fyri blásarar og sangkór, og vóru tey framførd í Vágs kirkju.

Talan var um eina stórfingna konsert, tí saman við uml 20 blásarum úr Eiðis Ljómfelag, vóru eisini blásarar frá Tvøroyrar Hornorkestri, sangkórið Ljómur úr Vági og uml 20 sangarar úr Vestmanna sangkóri, sum saman framførdu sirpuna, sum Atli K Petersen hevði lagt til rættis fyri kór og blásarar.

Høvi verður eisini at hoyra hetta verkið framført norðanfjørðs, tí hetta var tann fyrsta framførslan í eini røð av konsertum, sum verða at hoyra kring landið í næstum, og sum allar fagna Knút Olsen, tónaskaldi.

Allar konsertirnar verða settar saman á sama hátt - við blásarum og sangarum - og framførslur verða í Vágum, í Fuglafirði og Klaksvík, og til seinast í Vesturkirkjuni í Havn leygardagin 02. novembur kl. 16:00, har eitt stórt tal av sangarum og blásarum úr øllum landinum fagna Knúti Olsen."

Eiðis Ljómfelag.