Tíðindi
FUGLAR OKKARA á Sunda bókasavni
Kom og hugna tær í ein góðan tíma saman við tveimum serfrøðingum, sum hugfangandi greiða frá fuglum her á landi.
Sum liður í bókaframløgum kring landið, fara Silas Olofson myndatakari og Jórun Pólsdóttir lívfrøðingur at leggja stóra bókaverkið FUGLAR OKKARA fram á Sunda bókasavni mikukvøldið 19. oktober kl. 19.00.
Høvi verður at síggja fleiri av sjáldsama góðu fuglamyndunum úr bókini, umframt at hoyra ymiskt forkunnugt um fuglalívið í Føroyum. Høvundarnir fara eisini at greiða frá tilgongdini at gera bókina.
Endamálið við bókaverkinum er at kunna um fjølbroytta fuglalívið, sum er í Føroyum, og skapa gleði og alsk til føroyska náttúru og fuglalív.
Í verkinum FUGLAR OKKARA verður greitt frá livihátti, hvussu fuglurin flytur, og hvat hann etur, umframt myndir av fuglinum av báðum kynum og í ymiskum búnum. Serliga nógv verður gjørt burtur úr føroysku búfuglunum, har m.a. tekstabrot er um reiðran, myndir av eggum, um atburð í náttúruni, hvat hóttir fuglalív og um føroyska fuglaárið. Øll fuglasløgini eru lýst í myndum, sum í stóran mun eru tiknar í Føroyum.
Silas Olofson myndatakari og Jórun Pólsdóttir lívfrøðingur hava í mong ár arbeitt við nýggjari bók um fuglar í Føroyum. Bókin lýsir í teksti og myndum øll vill fuglasløg, sum eru skrásett í Føroyum.
Bókaverkið – trý prýðilig bind í húsa saman við eini fikkubók – verður til keyps hetta kvøldið.
Sunda bókasavn bjóðar ein drekkamunn aftaná framløguna.
Øll eru hjartaliga vælkomin.