Tíðindi

Sunda kommuna søkir eftir leiðara til dagstovnin á Flatinum á Oyrarbakka at byrja 1. august 2025 ella eftir nærri avtalu. Talan er um eitt fulltíðarstarv.

Leiðarin er starvssettur hjá Sunda kommunu við arbeiðsstaði á dagstovninum á Flatinum á Oyrarbakka.

 

Um dagstovnin á Flatinum

Dagstovnurin á Flatinum fevnir um vøggustovu, barnagarð og frítíðarskúla. Á Flatinum eru umleið 98 børn og 30 starvsfólk.

Dagstovnurin liggur í náttúruríkum umhvørvi, sum í stóran mun setur sín dám á námsfrøðiliga innihaldið.

Vit ímynda okkum ein leiðara, ið hevur hugsjónir í mun til námsfrøði og leiðslu, og sum vil virka fyri einum høgum fakligum støði, har námsfrøðiliga tænastan er í miðdeplinum. Einum leiðara, ið tekur ábyrgd og ynskir støðuga menning í egnum starvi, fyri starvsfólkini og av tí námsfrøðiligu tænastuni.

Leiðarin, saman við varaleiðaranum, mynda leiðslutoymið á stovninum. Leiðarastarvið er tí ein samantvinnan av sjálvstøðugum arbeiði og samstarvi, har tú fært avbjóðingar og møguleika fyri menning.

 

Um starvið

Sum dagstovnaleiðari kemur tú at arbeiða í tøttum samstarvi við kommunustjóran, og saman við øðrum dagstovnaleiðarum. Samstarvið hevur stóran týdning fyri, at dagstovnaøkið kann arbeiða fram móti eini felags kós og námsfrøðiligari dygd.

Í starvinum krevst at tú:

• Hevur ábyrgd av, at dagstovnavirksemið verður útint í samsvar við lógarverk, ásetingar og mál
• Hevur ábyrgd av at skapa umstøður fyri góðum dagstovnavirksemi
• Hevur leiðsluábyrgd av starvsfólkunum á dagstovninum og setir starvsfólk, í samstarvi við varaleiðara og álitisfólk
• Hevur ábyrgd av starvsfólkamenning í samstarvi við varaleiðaran
• Hevur yvirskipaða ábyrgd av foreldrasamstarvinum
• Hevur fíggjarligu og námsfrøðiligu ábyrgdina á dagstovninum
• Hevur ábyrgd av at tryggja umstøður fyri góðum dagstovnavirksemi
• Hevur ábyrgd av at arbeiða við umstøðum, ið krevja menning ella ábøtur
• Hevur yvirskipaða ábyrgd av bæði innanhýsis og uttanhýsis tvørfakliga samstarvinum
• Støðugt arbeiðir við at betra umstøðurnar á stovninum

Førleikakrøv

• Tú hevur útbúgving sum námsfrøðingur
• Tú hevur leiðsluførleikar
• Tú megnar at stuðla og kveikja áhaldandi menning av námsfrøðini á stovninum
• Tú hevur góðar námsfrøðiligar førleikar og megnar at geva sparring til starvsfólkini, bæði í mun til tað einstaka barnið og samlaða bólkin
• Tú ert virðilig/-ur og í tíni leiðslu og dugir væl at lurta
• Tú dugir væl at raðfesta, samskipa, leiða, kveikja, og at fáa mest møguligt burturúr tilfeinginum á stovninum
• Tú dugir væl at samskifta á skrift og í talu við leiðslu, starvsfólk, starvsfelagar, børn,  foreldur og aðrar samstarvspartar
• Tú hevur góðar telduførleikar
• Tú ert væl skipað/-ur í tínum arbeiði og hevur fíggjarligt hegni, innlit og yvirlit
• Megnar samstarv og tekur sjálvstøðugar avgerðir

 

Lønar- og setanartreytir

Starvið er fulla tíð og starvsbyrjan er 1. august 2025 ella eftir nærri avtalu. Løn og treytir verða sambært sáttmála millum Føroya Pedagogfelag og Kommunala Arbeiðsgevarafelagið.

Sambært §2 í barnaváttanarlógini hevur Sunda kommuna skyldu til at fáa barnaváttan til vega, áðrenn umsøkjari verður settur í starv.

 

Umsókn

Freistin at søkja starvið er fríggjadagin 23. mai 2025. Skrivlig umsókn, saman við møguligum viðmælum, upplýsingum um útbúgving og royndir skal sendast til sunda@sunda.fo. 

 

Nærri kunning

Meira fæst at vita um starvið við at venda sær til Erland Berg Danielsen, kommunustjóra, á telefon 29 72 05.