Tíðindi

Verandi vøllur er frá 2015, er væl brúktur og illa slitin. Seinasta vitjanin hjá FSF staðfesti, at vøllurin ikki longur kann nýtast til dystir á heilum vølli.

Sunda kommuna bað um tilboð uppá nýggjan vøll frá tveimum veitarum. Á eyka býráðsfundi, tann 10. apríl 2025, varð samtykt við 2. viðgerð at taka av tilboðnum frá Føroya Møblasølu/Domo Sports v. Birgir Andreasen. Nýggi vøllurin hevur korkfyllu, eins og vit kenna tað frá vøllunum í m.a. Klaksvík, Sørvági og í Gøtu. Við at velja korkfyllu hevur Sunda kommuna eisini hugsað um tað umhvørvisliga. Undirlagið undir graslíkinum verður somuleiðis skift. Føroya Møblasøla syrgir fyri veitingini, áleggingini og øðrum, sum hartil hoyrir.

Sunda kommuna og EB/Streymur skulu fyriskipa at taka gamla vøllin av og burturbeina hann. Avtalað er, at álegging av nýggja vøllinum byrjar umleið 30. juni. Arbeiðið tekur væntandi umleið tvær vikur. Fyrst í juni byrjar arbeiðið at taka gamla vøllin av og gera aðrar neyðugar fyrireikingar.

Vit í Sunda kommunu gleða okkum til felagið aftur fær hýst dystum á heilum vølli við Margáir, og vit vóna og vænta at vera við til at hýsa dystum til oyggjaleikirnar 2027 á nýggja vøllinum.